Namanganda MICE turizm forumi oʻtkazildi

Namangan viloyatida turizm sohasini rivojlantirish, xalqaro hamkorlikni kengaytirish va hududning turistik salohiyatini dunyo miqyosida keng targʻib qilishga qaratilgan nufuzli xalqaro tadbir — 65-xalqaro “Gullar festivali” doirasida tashkil etilgan MICE turizm forumi, ichki turizm yarmarkasi hamda B2B uchrashuvlari boʻlib oʻtdi. Forumda 10 ga yaqin mamlakatdan tashrif buyurgan 30 dan ortiq turizm sohasi vakillari, xorijiy hamkorlar, investorlar, turoperatorlar hamda mahalliy tadbirkorlar ishtirok etdi.
Tadbirda soʻzga chiqqanlar, bugungi kunda Namangan viloyati ziyorat, gastronomik, tibbiy, ekologik, togʻ va shopping turizmi kabi yoʻnalishlarda jadal rivojlanayotganini taʼkidladilar.
Shuningdek, anʼanaviy tarzda oʻtkazib kelinayotgan “Gullar festivali”, viloyatning boy madaniy merosi, qulay geografik joylashuvi va mehmondoʻstlik anʼanalari xalqaro forumlar, koʻrgazmalar oʻtkazish uchun keng imkoniyat yaratayotganini qayd etildi.
Forum doirasida boʻlib oʻtgan biznes muzokaralari va B2B uchrashuvlari natijasida mahalliy va xorijiy kompaniyalar oʻrtasida 150 dan ortiq shartnoma va oʻzaro hamkorlik kelishuvlari imzolandi. Bu esa Namangan viloyatining turizm sohasida xalqaro hamkorlik maydoni sifatidagi nufuzi tobora oshib borayotganini koʻrsatdi.